مش لازم نقول مواقف غمّ كل شويه… :)))

نزلت من عربية صاحبي علشان اركب ميني باص اوصل البيت… ربنا رحمني من دخول الموقف واستنى الميني باص يكمل ويطلع او الاقيه زحمه وواقف.. أول ما نزلت من عربية صحبي مشيت خطوتيين لقيت الميني باص في وشي وفاضي قولت مش مصدق ده 154 وفاضي والسواق وقفلي!! اول ما ركبت راح قايلي الله يباركلك شكلك عارف الطريق ممكن توصفلي الطريق إزاي علشان انا مش شغال على الخط ده… :)))

لاشك ان إستضافة قطر لكاس العالم سنة 2022 ده يعني لو ربما أطال في عمرنا وشوفناه.. حاجه ملهاش اي تلاته لازمه اهو ملعب و 22 بني ادم بيجروا ورا الكوره هتحطهم في قطر في امريكا او انجلترا او على المريخ في اي حته بالنسبة ليك واحد ممكن بس الاختلاف يكون في نوعية التلفزيون.

انا مش حزين علشان دولة عربيه زي قطر تبيع قضية فلسطين وقال ايه طفل عربي بيحضن طفل إسرائيلي وقال ايه امتى اليوم الي منتخب إسرائيل يلعب مع الفرق العربية… طيب وفلسطين ايه موقعها من الاعراب؟ الفرقه ديه هتيجي منين؟ من فلسطين! من أرضك الي مغتصبه من اكتر من 60 سنه الي اهلينا ادبحوا فيها الي امي وامك واختي واختك اغتصبوا فيها! فاكرينها؟ طيب فاكرين الاطفال الاسرائيلين في حرب غزه لما كانوا بيمضوا على الصواريخ الي هتنزل على نفوخ العيال -اولادنا او اخواتنا الصغيريين- تفرتكها! فاكرين الاسرائيلي الي عدّى بعربيته على جسم اخوك الفلسطيني بالعربيه اكتر من تلات مرات؟ فاكر محمد الدّره؟ مشكلتي انك فرحان ومش شايف اي مشكله.. لازم لو مش محروق من جواك تشوفلك علاج لازم تتعالج…

ان مش مستغرب ان الحكومات تبيع! انا بجد حزين ان الناس فرحانه بالطريقه الي قدمت بيها قطر ملفها للإستضافة -كنت هعمل نفس المقاله ديه لو كانت خسرت- ليه بنبيع بالرخيص ليه نلاقي مبررات للتطبيع؟ ليه نبقى أمعه!

لو مش فاكر شوف الصوره هتفتكر فلسطين لو نسيتها

الاطفال دول شهداء مش نايميين علشان يصحوا يتفرجوا على الماتش

الي اعرفه ان ابويا عمل كده بس مكنش مطالب منه انه يقدم خطه لمدة 25 سنه تثبت انه إختار صح وبقولها تاني إختار الناس قبل المكان اذا كان شغل نادي عمل خيري اي حاجه… لاقيت المكان الكويس من غير البني آدميين الكويسيين إبدا انت وإعمل ناس كويسه

انا عايش في مصريين… 2 * مصر يعني… مصر بلدي وغنيه عن التعريف بالسلبيات.. ومصر الي هي بيتي -عمارتي- الناس في عمارتنا عندهم سلبيه تقولك إن حال البلد مش جي من قله معروفه ومعرف عنها الفساد… هاحكي قصتيين

1- الاسانسير عندنا فيه عطل معين ودون الدخول في تفاصيل العطل ميكانيكيا لازم حد يطلع معاك فيه علشان تنزل دورك او تطلع الدور ال 12 غير كده هتنزل دورك والناس هتطلع على السلم -او لو ربنا بيحبك حد يجبهولك بنفسه- الاقي امبارح واحد طالع الدور التاسع وسيبه مفتوح!! طيب الساعه 2 بليل مين هيجبه للناس الي هتيجي بعديك؟ طيب الي بينزلوا يصلوا الفجر يعملوا ايه؟ اكيد مكنش هيخسر انه يطلع ال 12 وينزل 3 ادوار!! بس تقول ايه؟ يلا نفسي

2- بعد عيد الاضحى المبارك والسعيد والي الناس تحب تنسى الهموم وتبحث عن شئ سعيد تلاقي بعد الدبح واحد واخد عظم الاضحيه بتاعته وحاطه في دور اعلى من دوره ويخلي ريحة العماره لا تطاق والله انا ادركت ليه البني ادم ميقدرش يعتز بحد بيحبه بعد مايموت وليه الدفن رحمه!! الريحه كانت كريهه بشكل بشع بشع والناس كلها تستحمل الريحه بس حد يشيل او يجيب حد ويديله 5 جنيه ويشيل لا مش مشكلتنا طز ان شاء الله تولع!!

السلبيه مش هتتصلح من فوق لتحت بالعكس من تحت لفوق

عارف لما تعمل خير ويتردلك في ساعتها؟ او بعدها بفترة؟ بتبقى مش عارف تتكلم بس صدقني الخير بيتردلك بس انت لازم تبقى عندك القدره انك تستوعب ده او تبقى عارف تميّز الشئ الي هيحصلك انه “تدان” -كما تدين تدان- وانه مش من الصدفه انه حصل.

من كام اسبوع روحت اشتري فول وطعميه بعد الصلاه -صلاة الجمعه- المهم وقفت علشان ااقول للراجل بكذا فول وبكذا طعميه علشان اخدهم وامشي لقيت بنت جميله جداً واقفه على بعد متر مني كان شعرها اصفر وعنيها خضرا وطبعا اللون الابيض لون بشرتها يا عم ما تقول شقرا :) انا عند الجمال بضعف روحت رايحلها وقولتلها عاوزه ايه يا حبيبتي -ايوه يا عم ديه صغيره انت افتكرت ايه- قالتلي عاوزه فول و عجينة طعميه روحت حاطط البون بتاعي في جيبي وشوفت هي عاوزه ايه وجبتهلها لحد ما مشيت من المحل -المحل مش حاجه واحده يعني الطعميه في محل تاني- المهم روحت انا اجيب حاجتي في ناس زحمه وانا وسطهم الراجل اخد مني البون بتاعي مع اني مش أقرب واحد ليه ولما رحت اجيب الطعميه لأول مره الراجل يمسك من القرطاس ويقولي عاوز بكام وبكده ريحني بجد من موضوع لسعة الاصوابع من الطعميه الي خارجه من الزيت.

وانا ماشي قولت ربنا ردلي الجميل… الحمد لله

amiramsalah:

I luv Egypt but I’m not 7ezb Watani…I dream of a strong Islamic nation but I’m not E7’wan…I support freedom of speech but I’m not liberal…I work for change but I’m not with Barad3i!

 I’d like to change the title to MUSLIM-SUNNI but I didn’t for the sake of copyrights

للأسف او لحسن الحظ انا معشتش بره مصر… بس متخيل ان مفيش بلد زي مصر في الاتوبيس بعيدا عن المساوئ بس كتير ما تلاقي حد بيقوم من مكانه حتى لو مشاوره بعيد علشان يخلي حد يقعد مكانه على سبيل المثال وليس الحصر
تلاقي شاب قايم علشان عجوز
تلاقي شاب قايم علشان بنت حاسس ان ممكن حد يخبط فيها
تلاقي راجل كبير يقوم علشان عاجز
بحس انه هو ده الحب… مهو الي قايم مش هياخد حاجه ولا هيقعد عارف الي قامله مش مغصوب… بس هو عمل كده علشان بيحبه

امبارح كنت رايح مؤتمر لميكروسوفت في مساكن الشيراتون… ركبت من موقف التحرير… ااقرب للبيت واحسن علشان هيبقى فاضي المشوار كبير جدا لازم اقعد.. المهم الاتوبيس اتحرك وصلت لحد رمسيس.. طبعا ساعتها ماسك الموبيل وفاتح تويتر وفيس بوك وفجاه لقيت رجل كبير جدا باين عليه علامات الزمن بدون تردد قومت واقعدته. كان مضايق جدا وكل شويه يقول هو انا حظي اركب الاتوبيس ده علشان اتعبك واقومك معلش انا اسف وبدأ يتكلم-صدره كان بيتنفض من غالبا جريه ورا الاتوبيس- انه ازاي وصل منطقه هي بعد مساكن شيراتون (علشان انا نزلت قبليه) امبارح في 4 ساعات بسبب ابنه الي مخليه يجيب قطع الغيار لعربية ابنه ويروح التوكيل علشان يدهاله!! انا طول الطريق واقف جنبه بفكر ان ازاي هوصل لعمره (انا سألته -مقدرتش امسك نفسي- قولتلوا حضرتك عندك كام سنه قالي 70) فضلت باصص على شعره الابيض وراسه الي فيها تعاوير وجلده المكرمش وعنده كل الطاقه انه يخدم ابنه… مشوار مهلك في الظروف الي بنعشها… افكار كتير جت على بالي مش عارف احكيها بس لما شوفته حسيت بحزن عميق اوي مع سعاده ان عرفت اخلي الى حداً ما مشوار ابنه خفيف عليه!